O Truth's a braw collady-stane,
sae fu' o licht
it leams, a muckle siller stern,
athort the nicht.
But some wad hae it reid as bluid,
some gowd, or green,
and some they canna see't for mist
afore their een.
Bur aye they settle to be richt,
theirsels - or nane -
gin they but get an orra glisk
o yon braw stane.
O green, or gowd, or cramasie,
or siller licht -
which will you hae to traivel wi
athort the nicht?
Bessie J. B. MacArthur (b. 1889)